Viðskipti
| mbl.is
| 13.9.2007
| 11:11
Höskuldur Ásgeirsson nýr forstjóri Nýsis
Höskuldur Ásgeirsson rekstrarhagfræðingur hefur verið ráðinn forstjóri Nýsis hf frá 1. desember n.k. Á sama tíma lætur Sigfús Jónsson af störfum sem framkvæmdastjóri félagsins en hann hefur verið framkvæmdastjóri þess síðast liðin 10 ár. Sigfús mun hverfa til starfa erlendis og stýra útrás Nýsis í Bretlandi og víðar ásamt því að sitja í stjórn félagsins.
Í tilkynningu frá Nýsi kemur fram að Höskuldur Ásgeirsson er fæddur 1952. Hann lauk fisktæknaprófi frá Fiskvinnsluskólanum árið 1976, Cand. Oecon. námi frá viðskiptadeild Háskóla Íslands árið 1981 og rekstrarhagfræðings námi (MBA) frá Brunel/Henley Businsess School í Englandi 1989.
Höskuldur starfaði við ráðgjöf og reikningshald hjá Hagvangi/Hagtölu frá 1980 til 1983. Hann var markaðs- og sölustjóri Marels hf frá 1983 til 1986. Framkvæmdastjóri Iceland Seafood í Frakklandi og í Bretlandi frá 1987 til 1997 og forstjóri Gelmer-Iceland Seafood S.A í Frakklandi frá 1997 til 2000. Frá árinu 2000 hefur Höskuldur starfað sem forstjóri Flugstöðvar Leifs Eiríkssonar hf.
Höskuldur er kvæntur Elsu Þórisdóttur förðunarmeistara og eiga þau 3 börn en fyrir á Höskuldur einn son.
Vísir,
03. apr. 2009 11:49
FME: Ekki tilkynnt sérstaklega að forstjórinn væri regluvörður
Fjármálaeftirlitinu barst ekki sérstök tilkynning um að Höskuldur Ásgeirsson, þáverandi forstjóri Nýsis, hefði verið ráðinn regluvörður félagsins. Stofnunin rannsakar málið. Þetta kemur fram í athugasemd frá FME vegna fréttar á Vísi í gær. Þar var greint frá því að forstjóri Nýsis hefði einnig verið regluvörður félagsins.
Starfi regluvarðar má líkja við innra eftirlit fyrirtækis og því ekki heppilegt að forstjóri gegni því starfi þar sem ætla má að slíkt fyrirkomulag veki spurningar um hæfi regluvarðar og sjálfstæði hans gagnvart stjórnendum félagsins. Því má draga verulega í efa að slíkt fyrirkomulag fullnægði kröfum Fjármálaeftirlitsins og reglum um sjálfstæði og hlutverk regluvarðar.
Í fréttinni frá því í gær segir að Fjármálaeftirlitinu hafi ekki verið kunnugt um nein dæmi þess forstjóri sé jafnframt regluvörður. Í athugasemd FME er bent á að svar stofnunarinnar hafi verið á þá leið að FME hafi ekki verið kunnugt um tilvik þar sem „tilkynnt hefur verið að forstjóri félags sé jafnframt regluvörður þess." Það er að segja, FME vissi af fyrirkomulaginu en Nýsir hafði ekki tilkynnt stofnuninni það sérstaklega.
Reglur um innherjaupplýsingar og viðskipti innherja kveða á um að ráðningu regluvarðar og vararegluvarðar skuli tilkynna til FME. „Innherjalistar eru sendir rafrænt í gegnum skýrsluskilakerfi Fjármálaeftirlitsins, á þar til gerðum eyðublöðum og birtist listi yfir fruminnherja sjálfkrafa á heimasíðu Fjármálaeftirlitsins. Aðgangur að skýrsluskilakerfi Fjármálaeftirlitsins er bundinn við aðgang og lykilorð sem úthlutað er starfandi regluverði. Þegar regluvörður lætur af störfum ber því að senda upplýsingar um nýjan regluvörð og óska eftir að stofnaður sé nýr aðgangur fyrir viðkomandi. Jafnframt ber að loka eldri aðgangi," segir í athugasemd FME.
FME segir að í tilfelli Nýsis hafi engin sérstök tilkynning borist vegna ráðningar Höskuldar Ásgeirssonar í starf regluvarðar félagsins og ekki var óskað eftir nýjum aðgangi fyrir regluvörðinn. Umræddur innherjalisti barst Fjármálaeftirlitinu í júlí 2008 en Höskuldur Ásgeirsson lét af störfum hjá Nýsi hf. í nóvember 2008.
Þess má geta að þrátt fyrir að Höskuldur hafi látið af starfi forstjóra Nýsis fyrir nokkru og starfi nú fyrir sjávarútvegsfyrirtæki í Bretlandi er hann enn skráður sem regluvörður félagsins samkvæmt upplýsingum FME.