Hreiðar Már Sigurðsson, fyrrverandi bankastjóri Kaupþings, segist hafa tapað miklum eignum og fjármunum við hrun bankans. Hann segist ekki eiga peninga til að koma að uppbyggingu Íslands.

Þetta kom fram í viðtali við Hreiðar í Kastljósi Sjónvarpsins í kvöld.

„Ég er ekki auðmaður. Ég tapaði megninu af mínum sparnaði í bankahruninu seinasta haust,“ sagði Hreiðar Már. Hann sagðist eiga fyrir skattagreiðslum sínum, sem væru töluvert háar vegna tekna hans árið 2008.

Hann sagðist ekki hafa stundað verðbréfaviðskipti í nokkur ár. Hann hefði ekki átt önnur bréf en í Kaupþingi. „Ég á ekki fjármuni til að koma að uppbyggingu íslensks atvinnulífs.“