Framsóknarflokkurinn er íslenskur stjórnmálaflokkur sem skilgreinir sjálfan sig sem frjálslyndan, félagshyggjuflokk.[1] Hann var stofnaður 16. desember 1916 með samruna Bændaflokksins og Óháðra bænda og er elsti starfandi stjórnmálaflokkurinn á Íslandi. Framsóknarflokkurinn var upphaflega bændaflokkur og sótti kjörfylgi til bænda og íbúa þéttbýlis í landbúnaðarhéruðum. Í seinni tíð hefur fylgi hans lækkað úr rúmlega fimmtung atkvæða að meðaltali og var fylgi hans 11,7% í Alþingiskosningunum 2007 en í Alþingiskosningunum 2009 fékk flokkurinn 14,8% fylgi . Framsóknarflokkurinn er nú næst minnsti flokkurinn á Alþingi með níu þingmenn.
Talsverðar breytingar hafa átt sér stað innan flokksins á síðustu árum. Þann 17. nóvember 2008 sagði sitjandi formaður, Guðni Ágústsson, af sér þingmennsku og formannsembætti eftir mikla gagnrýni flokksmanna á flokksforystuna á miðstjórnarfundi helgina 15.-16. nóvember. Valgerður Sverrisdóttir tók þá við sem formaður og gegndi því embætti þar til nýr formaður yrði kosinn á flokksþingi flokksins sem flýtt var fram til janúar 2009. Fimm manns buðu sig fram til formanns. Það voru þeir Lúðvík Gizurarson, Páll Magnússon, Jón Vigfús Guðjónsson, Höskuldur Þórhallsson og Sigmundur Davíð Gunnlaugsson. Tveir buðu fram til varaformanns en það voru þau Siv Friðleifsdóttir og Birkir Jón Jónsson.[2] Sigmundur Davíð Gunnlaugsson var kjörinn formaður flokksins 18. janúar á flokksþingi flokksins og Birkir Jón Jónsson var kjörinn varaformaður.